Австриските власти ги проучуваат снимките од концертот на Марко Перковиќ Томпсон во Загреб и доколку утврдат дека некој од 18.000 купувачи на билети од таа земја, особено оние со регулиран привремен престој во Австрија, извикал „За дом спремни“, ќе се соочи со сериозни последици, што може да вклучува и одземање на правото на престој, пишува Н1 телевизија.
Како што се наведува, австриските истражители ги прегледуваат сите достапни снимки и фотографии од концертот на Томпсон во хрватската престолнина.
Според организаторите, меѓу половина милион посетители на концертот, повеќе од 18.000 од нив купиле билети во Австрија.
Целта на австриските служби е да утврдат дали Хрватите со австриско државјанство или лицата со регулиран привремен престој во Австрија ги прекршиле строгите австриски закони што забрануваат ширење на фашизмот за време на концертот.
Санкциите варираат – од прекршоци и кривични дела до забрана за влез во земјата, доколку станува збор за странски државјани, како што се Хрватите кои живеат и работат во Австрија.
Во 2018 година, Австрија го измени законот за да го прошири списокот на забранети симболи. Во тоа време, тој ги вклучуваше и симболите на усташкото движење, кој на тој начин се изедначени со симболите на екстремистичките и терористичките организации како што се Исламска држава и Ал Каеда – што значи дека нивната промоција и пропагирање сериозно ги крши австриските закони.