Властимир Ѓорѓевиќ, поранешен висок полициски функционер на Србија, призна дека во 1999 година биле извршени воени злосторства врз Албанците на Косово и им се извини на цивилните жртви, објавува порталотBalkaninsight.
„На Косово во 1999 година беа извршени воени злосторства. Не сакав овие злосторства да се случат и да можам да го вратам времето, би дејствувал поинаку“, изјави во понеделник Властимир Ѓорѓевиќ, поранешен помошник на српскиот министер за внатрешни работи, на крајот на жалбеното рочиште пред Трибуналот во Хаг.
„Им се извинувам и на бегалците. Се надевам дека иднината на овој регион ќе биде посветена на мирот“, нагласи тој.
По завршните зборови на обвинителството и одбраната, Ѓорѓевиќ, рече дека тој дознал за воените злосторства извршени од страна на српските сили, кога во 2001 година во реката Дунав беа пронајдени тела во камион.
„Искрено жалам заради тоа и жалам што не поднесов оставка на мојата позиција во тоа време и жал ми е што не му се спротивставив на министерот … Тоа е причината зошто се чувствувам виновен“, рече Ѓорѓевиќ.
Во септември 2011 година, МКТЈ го осуди Ѓорѓевиќ на 27 години затвор, за прогон врз политичка, расна и верска основа, за убиства и депортација.