Скопје и Тетово се уште имаат високо ниво на загаденост, покажуваат податоците на Министерството за животна средина. Во Скопје најголема загаденост е измерена кај Ректоратот, каде дури за два и пол пати е зголемена концентрацијата на ПМ10 честичките и изнесува 122.4 µg/m3.
Само за споредба највисоката гранична вредност на дозволено количество на ПМ10 честичките е 50 µg/m3. Населбата Лисиче е втора по загаденост со 103.0 µg/m3, а не помалку се загадени и Центар и Карпош. Нема податоци каква е загаденоста на воздухот со овие опасни по здравјето на луѓето честички, а загаденоста не се мери и во повеќе градови во државата.
И покрај ова нема да се воведуваат нови мерки во врска со квалитетот на воздухот, а остануваат да важат само препораките за граѓаните. Така одлучи Владата на последната седница кога била разгледана информација на Министерството за животна средина во врска со квалитетот на амбиенталниот воздух.
– Најновите податоци покажуваат дека концентрациите на материи и честички во воздухот од пред дваесетина дена се видно намалени и се очекуваа нивното количеството во идниот период да остане во овие прифатливи граници. Владата препорачува и понатаму максимално да се внимава на квалитетот на огревниот материјал кој се користи, да се возат што е можно помалку автомобили и населението помалку да се изложува на отворено, се вели во соопштението од кабинетот на министерот за животна средина и просторно планирање.
Од таму потсетуваат дека престанаа да важат мерките за ослободување од работа на лицата со возраст над 60 години, бремените жени и лицата со астма, како и организирање на работите на отворено во временскиот интервал од 11 до 17 часот.
Скопје и Тетово и покрај топлото време продолжуваат да се гушат во магла.Опасните честички, иако не се гледаат предизвикуваат штета по здравјето на луѓето. Лекарите потенцираат дека загадувањето предизвикува иритирање на дишните патишта и дополнителни здравствени проблеми.
-Загадувањето на воздухот може да предизвика сериозни проблеми по здравјето на луѓето кои можат да бидат акутни со појава на течење на нос, печење на очи, надразнителна кашлица , но и хронични кои се поопасни и може да доведат до Хронична опструктивна болест и малигни заболувања на белите дробови, што е водечка причина за смртност во последните години изјави за НОВА доктор Деска Димитривеска пулмо-алерголог, во екот на најголемото загадување. .
Министерот за животна средина Адеми посочи дека големите загадувачи работат со намален капацитет, односно го имаат намалено производството за 30 проценти.
Загадувањето иако е намалено во последните денови , сепак останува во категоријата „високо“, што не ги амнестира надлежните да превземаат мерки за заштита на здравјето на граѓаните предупредуваат стручњаците.