На инклузивна консултација Владата денеска оствари работен состанок со невладиниот сектор и медиумите, каде се предложени пет теми за работни групи кои ќе дадат свој придонес кон Итните реформски приоритети.
Премиерот Зоран Заев, потенцирајќи дека реформите се неопходни за членство на Македонија во НАТО и во ЕУ, рече дека владините очекувања се до крајот на годинава да се добие чиста препорака за преговори со ЕУ, а наредната да се добие и датум за отворање на поглавјата за полноправно членство.
„Намерата на Владата е до крајот на годината, Република Македонија да добие чиста препорака за почеток на преговорите со Европската Унија, а идната година да добиеме датум за почеток на преговорите за полноправно членство. Обезбедивме позитивен политички амбиент за овие цели“, рече Заев, потенцирајќи дека тоа е препознаено и од Брисел и од Алијансата.
Владеењето на правото, реформите во јавната администрација, изборите, Собранието и независните регулаторни тела како и медиумите се темите на кои ќе работат работни групи со цел изготвување на план по кој треба да работи Владата.
Премиерот воедно рече дека во сите демократски и граѓански ориентирани сили гледа партнер на патот кон реформите.
„Владата уште од првиот ден почна со интензивна агенда. Бевме во Брисел каде бевме примени на највисоко ниво, што е уште еден поттик за нашата посветеност кон евроагендата кој е план без алтернатива“, изјави пак заменик0претседателот на Владата задолжен за европски прашања, Рече Османи.
Како што информираше тој, реформскиот план на Владата ќе се базира на Пржинскиот договор, Охридскиот рамковен договор, Итните реформски приоритети од извештајот на експертот Прибе, Препораките од ОБСЕ/ОДИХР, Венецијанската комисија и сите останати релевантни институции кои имаат свои препораки кон Македонија.
Планот за евроинтеграции ќе му биде претставен на еврокомесарот за соседска политика и проширување, Јоханес Хан при неговата посета в понеделник, при што е најавено негово учество на седница на македонската влада, а како што рече Османи по одржувањето на кредибилните избори, останува да се завршат реформите за Македонија до октомври да добие безусловна препорака за членство во ЕУ.