Владата синоќа на седницата го утврдила новиот текст на Законот за изменување на Законот за поштенските услуги, со што најави дека се подготвува теренот за продажба на Македонска Пошта, откако истата почна да тоне во загуби и стана јасно дека и нема спас. Ќе се прави физибилити студија за да се види кои се можностите за друштвото, но во игра е целосна продажба односно приватизација или преземање на компанијата со јавно приватно партнерство.
За сиот процес биле задолжени вицепремиерот задолжен за економски прашања Фатмир Битиќи, министерот за економија Крешник Бектеши и директорот на Национални пошти Ејуп Ристеми.
„Да иницираат подготовка на физибилити студија за можностите за отпочнување на постапка за преземање на компанијата со јавно приватно партнерство или со приватизација за да продолжи процесот на либерализација на поштенските услуги во земјата согласно регулативата на ЕУ“, соопштија од Владата.
Ситуацијата стана уште полоша поради здравствената криза, а особено откако пропаѓањето на Еуростандард Банка, и сега друштвото тоне и генерира само загуби. Ејуп Рустеми, првиот човек на компанијата за Фактор тврдеше дека вработените земаат редовни плати, сепак, вели оти со здравствената криза се случил огромен пад на приходите на поштенските услуги, и во домашниот, а особено во меѓународниот поштенски сообраќај. Во првата половина од годината друштвото има загуба од 52,5 милиони денари или над 850 илјади евра.
Рустеми вели дека дополнително ги погодило затворањето на Еуростандард банка и дека ликвидноста на друштвото е намалена. Впрочем од 12 август наваму на шалтерите на пошта не може да се обезбедат финансиските услуги и услугите на платниот промет за многу граѓани и правни лица.