Агенцијата за аудио и аудиовизуелни медиумски услуги да им укаже на кабелските оператори во Северна Македонија да ги исклучат каналите каде како основач се јавува Руската Федерација или приватни лица, правни или физички лица со потекло од оваа држава, препорача Владата на Република Северна Македонија.
Овие мерки се преземаат и во другите земји во Европа, по нападот на Русија врз Украина и се дел од санкциите што САД и ЕУ ги воведоа кон Русија.
Вчера и независната комисија за медиуми на Косово (КПМ) наложи времено исклучување на сите телевизиски канали по потекло од Русија од косовските телевизиски платформи и побара од медиумите да внимаваат на дезинформациите и лажните вести во врска со ситуацијата во Украина по руската воена акција во таа држава.
Пред само неколку дена и Естонската Агенција за заштита на потрошувачите и технички регулативи (TTJA) го забрани емитувањето на руските канали „РТР Планета“, „НТВ Мир“, „Росија 24“ и „ТВ Центар Интернационал“ на една година. Слична забрана беше воведена и за телевизијата „Белорусија 24“.