Државна кардиохирургија основала Владата на последната седница, а веднаш била назначена и директорка, Биљана Теофиловска која е економски директор на Клиниката за торакална хирургија.
Оваа вест бомбастично беше најавена на прес конференција, чија тема се држеше во тајност до последен момент. Државната кардиохирургија на почеток ќе биде сместена на Хирушките клиники, односно на Клиниката за торакална хирургија, а кога ќе се создадат услови ќе биде префрлена на Клиниката за кардиологија.
Целиот проект ќе чини 2, 5 милиони евра, а финансиските средства се обезбедени од буџетот на Министерството за здравство. Министерот Тодоров соопшти дека веднаш ќе биде распишан тендер за медицинска опрема во вредност од 1 725 000 евра и тендер за адаптација на просторот за 700 000 евра.
Се држи во тајност кои кардиохирурзи ќе оперираат во Државната кардиохирургија. Тодоров најави дека ќе оперираат тројца кардиохирурзи, дел ќе бидат од странство, дел од Македонија.
Н а новинарско прашање, што ја натера Владата да се предомисли бидејќи досега сметаа дека пациентите се згрижени, заради постоењето на двете приватни кардиохирургии, Тодоров одговори:
-Големиот процент на смртност од кардиоваскуларни заболувања се причина за ваквата одлука, како и реализацијата на повеќе деценискиот сон, јавното здравство да добие кардиохирургија, изјави Тодоров.
Медицинскиот кадар ќе биде формиран и оспособен за работа во период од еден и пол до два и пол месеци најави министерот. Само пред три месеци беше објавен оглас на Клиниката за торакална хирургија, за прием на пет доктори на медицина кои ќе бидат упатени на специјализација по кардиохирургија.
Кои доктори се пријавиле и дали успеале за толку кратко време да станат кардиохирурзи, останува да видиме во наредните денови, кога Тодоров најави дека ќе ги соопшти имињата на стручњаците што ќе оперираат.
Во 2010 година Министерството за здравство се откажа од основање на Државна кардиохирургија, во моментот кога требаше да профункционира втората приватна кардиохирургија. Досега, надлежните сметаа дека не се создадени услови и нема потреба од Државна кардиохирургија која се заговараше повеќе од 25 години.