Голем опозициски протест на 18 јуни во Скопје, а дотогаш ќе продолжи активната блокада на Собранието, најави Тимчо Муцунски, потпретседатрел на ВМРО-ДПМНЕ, по завршување на вечерашниот состанок на Извршниот комитет на партијата.
„Молкот не е опција, протест за промени и подобар живот. Основата причина за одлуката е отсуството на било каква подготвеност на премиерот за вообичаен политички дијалог со опозицијата“, порача Муцунски и повика на масовна излезност на 18 јуни.
Опозициската партија останува на ставот дека предвремени парламентарни избори се единствено решение за, како што велат, излез од кризата и штетните политики на власта. Во таа насока, Муцунски зборуваше за енергетската криза, за инфлацијата и за зголемените трошоци на компаниите. Тој додаде дека капиталните инвестиции се паднати на ниско ниво, не е испорачан датум за почеток на преговорите за членство во ЕУ, а на проблемите во правосудниот систем, како што рече, укажуваат и меѓународните фактори.
Муцунски ги спомена и инцидентите како автобуската несреќа кај Ласкарци, изгорената монтажна болница во Тетово, автобуската несреќа во Бугарија за кои посочи дека нема никаква одговорност.