На новинарско прашање, дали ВМРО-ДПМНЕ ќе повика на бојкот на пописот, откако сите амандмани на опозицијата беа одбиени, Стефан Андоновски, член на ИК на ВМРО-ДПМНЕ, на прес- конференција изјави дека СДСМ успеа, односно се труди да донесе фалсификат попис односно да направи пописен инженеринг како што направија и изборен инженеринг.
„Нејасни се за нас три поенти, односно три состојби. Првата, зошто не се објавува методологијата на попишување која што требаше да биде интегриран дел на Законот за попис за сите да ја видат? Под број два, зошто СДСМ е против терминалите за отпечаток на прст кои што секако треба да се набават и е законска обврска за локалните избори кои ќе се одржат оваа година и третиот дел тоа е дека СДСМ се обидува да направи попис во кој луѓето нема да имаат доверба, граѓаните нема да имаат доверба и институциите нема да имаат доверба“, истакна Андоновски, додавајќи дека тие имаат принципиелен и јасен став.
„Нема да го поддржиме и почитуваме пописот и идната влада на ВМРО-ДПМНЕ ќе спроведе кредибилен попис по сите стандарди на ЕВРОСТАТ и другите европски и институции на Обединетите Нации“, вели тој.
Пред новогодишните празници се одржа седница на Комисијата за европски прашања на која беа разгледувани амандманите што ги поднесоа ВМРО-ДПМНЕ (26) и Алијанса за Албанците и Алтернатива (10).