Откако Советот за култура на СДСМ го повика градоначалникот на општина Центар Андреј Жерновски да направи ревизија на проектот Скопје 2014, експресен одговор стигна од ВМРО-ДПМНЕ.
„СДСМ конечно разбраа дека се фатени во лага и дека се разоткриени сите манипулации кои ги кажуваа и правеа сите овие години, а поврзани со реализацијата на проектот Скопје 2014. Долго време лажеа дека проектот чини милјарда евра и врз основа на таа лага ја градеа својата политика. Но, за нивна жал, со документи се докажа дека не само што проектот чини далеку помалку средства од тоа што СДСМ тврдеше, туку и дека во сите процедури се запазени законските постапки и транспарентност. Се е јавно презентирано пред медиумите и граѓаните се вели во соопштението од Центарот за комуникации на ВМРО-ДПМНЕ.
Воопшто не сме изненадени од погрдните и ниски зборови кои т.н. Совет за култура на СДСМ ги употребува за овој проект, а не доликуваат на луѓе кои себеси се нарекуваат културни работници, но тоа го разбираме единствено заради стравот од конечното разоткривање на своите лаги и манипулации.
Да потсетиме, со документи и транспаренто се покажа дека сите елементи од проектот се спроведени во законска процедура и транспарентно, дека чини многу помалку од тоа што СДСМ ја лажеше јавноста, дека чини само 1,5% од Буџетот во последните години и дека од ден на ден се зголемува значењето на овој проект за Република Македонија одговараат од ВМРО-ДПМНЕ.
Од Советот за култура на СДСМ денеска предупредија дека финасиска ревизија на проектот нема да биде доволна бидејќи срамот на нацијата е предизвикан по многу други основи.
„ Да потсетиме дека Скопје не осамна на насловните страници на сите светски весници по финансискиот скандал туку како „престолнина на кичот“. Проектот меѓу другото е и финасиски скандал, не „перење“, туку „гнасење“ на тешко спечалените народни пари, потрошени на незаконски градежни работи, бездарнички скулптури и панаѓурски кич, како и со астрономски и со ништо заслужени хонорари и набавки на реквизити по цени на кои би им позавидел и емирот од Катар рекоа денеска во соопштението од Советот за култура на СДСМ.