Во врска со расправата поврзана со донесувањето на Законот за аудио и аудио визуелни медиумски услуги и Законот за медиуми ВМРО-ДПМНЕ го истакнува следното:
Процесот на подготвување на текстот на овие два закони, јавните расправи, консултациите и усогласувањата со домашни и меѓународни заинтересирани субјекти трае повеќе од година и половина. Во тек на овој период одржани се повеќе јавни расправи, но и директни средби со голем број на здруженија, асоцијации и заинтересирани субјекти. Во рамките на текстовите на овие предлог закони се вградени огромен број на забелешки и препораки кои доаѓаа и од ОБСЕ и од Советот на Европа, но и од здруженијата и асоцијациите на новинарите, на приватните електронски медиуми, на локалните и регионални радиудифузни друштва, на интернет провајдерите итн.
>>Макрадули: ОБСЕ го демантираше министерот Ивановски
>>Мијатовиќ:Нема потреба да се дефинира со закон кој е новинар
ВМРО-ДПМНЕ ја поздравува одлуката на македонското Собрание да се организира одделна јавна расправа за двата закони. Цениме дека тоа е правилниот начин како може да дојде до понатамошно подобрување на текстот на овие два исклучително важни закони. Потврдуваме дека, како и до сега, сите конструктивни идеи и предлози ќе најдат место во финалната верзија на Законот за аудио и аудио визуелни медиумски услуги и Законот за медиуми. Со посебно внимание повторно како и до сега ќе се осврнеме на сите забелешки и идеи кои ќе доаѓаат од меѓународните организации, но и од здруженијата и асоцијациите на новинари во Република Македонија.
Ја повикуваме опозицијата наместо со напади по се и по било која цена, во еден разумен и конструктивен процес да се вклучи во донесувањето на овие два закони.