ВМРО-ДПМНЕ најавува тужби и пенали од страна на правни субјекти, за да се заштитат од најавениот мораториум за Скопје 2014 од страна на новиот градоначалник Андреј Жерновски, кој тие го нарекуваат незаконски постапки.
ВМРО-ДПМНЕ соопштува дека инсистира Жерновски да направи контрола на сите постапки и процедури поврзани со спроведување на проектот Скопје 2014 и да ги објави резултатите, што е можно побрзо.
Според ВМРО-ДПМНЕ за сите објекти што се во изградба, постојат законски договори со прецизно утврдени рокови, а во тој случај штетата ќе треба да ја плати Буџетот на Општина Центар, а не Андреј Жерновски лично, вели во писмената реакција владејачката ВМРО-ДПМНЕ.
После оваа реакција на ВМРО-ДПМНЕ, со соопштение излезе и Министерството за култура, кое вели дека градоначалникот на општина Центар нема правен основ за мораториум на изградбата на објектите кои се во надлежност на Министерството за култура.
– Потенцираме дека за сите активности поврзани со градбите коишто преку Министерството за култура се реализираат на територијата на општина Центар се постапува во согласност со законските прописи во Република Македонија, а објектите се градат во согласност со добиените правосилни одобренија за градење, стои во соопштението на Министерството за култура.