Владејачката ВМРО-ДПМНЕ денеска до Собранието достави предлог за имени во Уставот, според кој бракот се дефинира исклучиво како заедница помеѓу еден маж и една жена. Со тоа, ВМРО-ДПМНЕ, во рамките на Уставот планира да ја вгради можноста посвојување на деца да им биде дозволено исклучиво на заедница составена од родители од различен пол, како и од самохрани родители, информираше пратеникот Влатко Ѓорчев.
Според Ѓорчев оваа иницијатива со огромно мнозинство е поддржана од народот согласно традиционалните вредности и изрази надеж дека ќе биде поддржана од сите политички партии.
За да се донесат уставните измени, предлогот на ВМРО-ДПМНЕ мора да го поддржи и опозицијата, бидејќи за вакви интервенции е потребно дво-третинско мнозинство.
Во Уставот на Република Македонија, член 40 пишува:
„Републиката му обезбедува посебна грижа и заштита на семејството. Правните односи во бракот, семејството и вонбрачната заедница се уредуваат со закон. Родителите имаат право и должност да се грижат за издржување и воспитување на децата. Децата се должни да се грижат за старите и изнемоштени родители. Републиката им обезбедува посебна заштита на децата без родители и децата без родителска грижа“.
Пратеникот Влатко Ѓорчев рече дека измените во Уставот се однесуваат исклучиво за оваа категорија и дека нема да има пакет со други решенија.