На неколку дена до крајот на изборниот процес од локалните избори, ВМРО-Народна партија излезе со констатација дека во текот на едномесечната кампања ниту еднаш на националните телевизии не била пренесен дел од говор во живо од претседателот на ВМРО-Народна партија г-дин Љубчо Георгиевски, иако тој присуствуваше и имаше свои обраќања на повеќето од митинзите на Сојузот за иднината.
„Тоа е само уште еден доказ, колку медиумски е контролирана нашата држава. Единствениот жив глас кој можевме да го чуеме во оваа предизборна кампања беа негативните спотови кои ги нарачува ВМРО-ДПМНЕ“, реагираат од ВМРО-Народна партија.
Според нив, ВМРО-ДПМНЕ е претворена во најкукавичката партија од кога постои македонската демократија. Се плашат од директни соочувања, дебати, дуели, а единственото што знаат е политичките противници максимално да ги цензурираат и преку монтажи да ги извртуваат нивните изјави преку инсталираната медиумска контрола.
По повод најновиот монтиран спот со извлечени реченици за бугарофилство на претседателот Георгиевски, велат од ВМРО-Народна партија, дека најголемото бугарофилско лоби се уште го препознаваме токму во актуелното ВМРО-ДПМНЕ: Антонио Милошовски, Силвана Бонева, Влатко Ѓорчев, Илија Китаноски, Мане Јаковлевски, Љубиша Георгиевски, Зоран Тодоровски, Борис Стојменов, Љупчо Јакимовски, д-р Чибишев, Зоран Димитровски, Михајло Георгиевски, Елизабета Канчева, Васил Пишев, целите семејства Димитрови, Лепавцови, Боеви… и да не ги редиме понатаму по општински комитети, затоа што ќе ни треба многу простор.