ВМРО-НП со внимание ги следи настаните околу оддавањето почит на загинатите борци од конфликтот од 2001 година во меморијалниот центар во село Слупчане од страна на висока владина делегација составена од министри од ДУИ предводена од потпретседателот на Владата на Р.Македонија г-динот Муса Џафери и истовремено сме зачудени од повеќедневното нереагирање на ВМРО ДПМНЕ.
Минатата година ВМРО ДПМНЕ на ист ваков чин одговори со жестока реакција преку партиски и владини соопштенија дури и со закани за кривична одговорност од страна на Претседателот.
Во сите нивни осуди на оваа постапка преовладуваше ставот на партијата дека со овој чин грубо е нарушено достоинството на македонскиот народ и дека ВМРО ДПМНЕ е историски предодредена по секоја цена да го брани. Дури и како одговор експресно предложија Закон за бранители и тоа по итна постапка а и со низа други несоодветни реакции ги испровоцираа и нивните коалициони партнери и сериозно ги повредија чувствата на Албанците со што ги доведоа меѓуетничките односи на работ на сериозен конфликт.
ВМРО-НП прашува што се случи за само една година за партијата ВМРО ДПМНЕ да не даде никаков коментар? Дали ова значи дека ВМРО ДПМНЕ многу лесно се прилагодува на новонастанатите ситуации во Р.Македонија кои се предизвикани од активностите на ДУИ и со молчење ги прифаќа како нормални односно ,,си легнува на брашното“?
Каде исчезна длабоката загриженост и светата должност на ,,Најмакедонската партија“ за одбрана на достоинството на македонскиот народ за кој упорно тврдеа дека е нивна возвишена цел и какви повозвишени цели се појавија годинава па го избраа молчењето како најсоодветно?
ВМРО-НП го повикува ВМРО-ДПМНЕ под итно да престане со досегашниот начин на бранење на достоинството на македонскиот народ, затоа што со нивните постапки прави поголема штета.
Оттука, ВМРО-НП апелира: ВМРО – ДПМНЕ веднаш да го повлече едностраниот Закон за бранители и да седнат со коалициониот партнер ДУИ за да предложат заеднички закон во кои ќе бидат гарантирани правата и на бранителите и на припадниците на ОНА, учесници во воениот конфликт од 2001 година. Тоа ќе придонесе за историско помирување на Македонците и Албанците и понатамошно заедничко живеење.