Според анализата на ВМРО Народна партија, ако задолжување на Владата спрема македонските банки продолжи со ова темпо, повеќе од јасно е дека до крајот на годината Македонија ќе биде втората држава врз која ќе биде применет кипарскиот модел на санација на владините долгови.
Од ВМРО Народна партија ја изразуваат својата голема загриженост по новото задолжување од 140 милиони евра – за буџетски расходи, односно исплата на тековна плата и пензија.
„ВМРО НП не е зачудена од однесувањето на оваа влада и тоталната нејзина неодговорност кон макро финансиската состојба на државата, затоа што веќе неколку години тоа е нејзин стил на економско функционирање“, соопштуват од партијата.
Ова соопштение повеќе е упатено кон менаџерите на банките во Република Македонија, со цел сериозно да се замислат за своите активности во насока на заштита на депозитите на македонските граѓани и фирми, кои веќе ја имаат дадено својата доверба кон нив.
Со новото задолжување долгот на Владата кон македонските банки веќе е зголемено на 1 милијарда и 100 милиони евра. Имајќи ја предвид и препораката на ММФ, македонската влада да се задолжува само од внатрешни извори, не и од надворешни, ова треба да биде доволен аларм за секој разумен менаџер.