ВМРО-НП е зачудена од молкот презентиран од македонскиот дел од владата преспивајќи го овој мошне значаен период пред Самитот што треба да се одржи на 27 и 28 јуни во Брисел.
Според оваа партија единствената активност е лелекот и плачот што Македонија нема да биде на дневен ред на Самитот, притоа постојано префрлувајќи ја вината и барајќи ја одговорноста во измислените непријатели на Македонија.
ВМРО-НП ја поздравува искреноста и транспарентноста на вицепремиерот на Владата Фатмир Бесими на седницата на Националниот совет за евроинтеграции каде што јасно од прва рака ја убеди и ѝ обзнани на целата македонска јавност дека проблемот со името не е единствената пречка за нашата евроатланска интеграција.
„Господинот Бесими јасно ги посочи сериозните проблеми со судството и законодавството, катастрофалната состојба во однос на слободата на медиумите, непостоењето договори за добрососедски односи, лошата економска состојба (највисоката стапка на сиромаштија и невработеност во Европа), како и екстремно ниското ниво на меѓунационалните односи во Македонија.
– Ние во ВМРО-НП констатираме дека горенаведените проблеми се многу посериозни, покомплексни и можат да предизвикаат многу поголеми и далекусежни последици отколку спорот со името. Имаме чувство дека проблемот со името служи само како катализатор преку кој не може да излезат на површина ваквите реални сериозни проблеми што ја изолираат Македонија“, сметаат од ВМРО-НП.
ВМРО-НП ја поддржува мултинационалноста и граѓанскиот концепт кој денес е реалност во Македонија и се согласува со ставот на Бесими дека само Македонците не можат да поседуваат монопол и ексклузивитет во однос на проблемот со името бидејќи таквиот проблем ги засега сите граѓани што живеат во Македонија, а Албанците, како што велат, досега се покажаа како „извонредно конструктивен фактор и имаа огромно разбирање за националните чувства на Македонците“.