Оставката на претседателот на СДСМ, Зоран Заев е ефектуирана и во партијата почнува процесот на внатрепартиски избори кои ќе се одржат на 12 декември. Ова го информираше портпаролката на оваа партија, Богданка Кузеска. Таа кажа дека од утре ќе почне процесот за поднесување на кандидатури за иден лидер на СДСМ. Прашана дали бил промовиран актуелниот заменик – министер за финансии, Драган Ковачевски, таа одговори.
– Станува збор за коментар на квалитети на еден човек. Претседателот на СДСМ ќе се бира на внатрепартиски избори. Од утре се отвора постапката за избор на нов претседател на СДС и ќе можат да се пријават сите членови на СДСМ, изјави Кузеска.
Таа кажа дека Зоран Заев по 12 декември ќе биде активен член на партијата. Но, дали ќе биде дел од идното партиско раководство, ќе се знае откако ќе се избере новиот претседател на оваа партија, по што ќе се формираат членовите на Централниот и Извршниот одбор на СДСМ.
Кузеска на прес – конференцијата информираше и дека оваа партија има стабилно мнозинство од 61 пратеник. Во партијата отворена е и можноста за вклучување на Алтернатива во парламентарното мнозинство на СДСМ, преговори за кој е задолжен лично Заев.