По вчерашните немири во Сараево денеска е мирно. Пожарникарите 15 часа ги гасеа запалените згради на претставништвата низ Босна и Херцеговина.
Како што јавуваат тамошните медиуми сите противпожарни апарати се празни и се поставува прашањето како и со што ќе се угасне некој пожар ако биде запален денеска.
Демонстрантите зад себе оставија искршени реклами, трафики, трамвајски стојалишта, телефонски говорници- градот е покриен со стакло.
Според податоците на медицинските установи во Сараево биле повредени 156 лица, од нив 90 полицајци и 66 цивили. Агенцијата Тањуг јавува за повредени 144 полицајци од кои 12 потешко.
Непроценлива штета е направена во Сараево, каде гореше Архивот на БИХ, кој се наоѓа во зградата на Претставништвото на БИХ, каде се уништени важни историски документи, посебно архивскиот материјал од периодот на австроунгарското владеење 1878-1918.
Во Тузла беше запалена зградаа на кантоналната влада и зградата на општината. Демонстрантите по масовните протести во вечерните часови продлжија да се движат низ градот при што кршеа излози и разни објекти.
Во Мостар е запалена зградата на Владата на Херцеговачко-неретванскиот кантон, зградата на градското собрание и просториите на Хрватската демократска заедница на БИХ.
Во Зеница и Бихаќ демонстрантите ги запалија згрдите на кантоналните влади. Во Брчко вчера незадоволните граѓани го заробија но подоцна го пуштија градоначалникот Анте Домиќ. Повредени се десетина полицајци и граѓани, еден новинар е однесен во болница, кој бил погоден со камен во главата.
Вчера оставка си поднесе Владата на Зеничко-добојскиот кантон, како и премиерот на Тузланскиот кантон, Сеад Чаишевиќ.
Протестите почнаа во средата во Тузла поради тешката економска и социјална ситуација, по што се проширија низ другите градови и прераснаа во насилство.