Битолчани денеска излегоа на улиците на протест против полициската бруталност. Протест беше организран откако пред некој ден битолчанец беше брутално претепан со клоци и пендрек од страна на полициски службеник.
„Протестот беше најавен уште пред два дена затоа што сите знаеме дека бруталноста врз нашите граѓани Роми кој ашто ја направи полицијата во СВР Битола е тотално на најниско ниво за ромската популација. Ова е де-мобилизиран мировен протест затоа што вчера премиерот на нашата држава и министерот за внатрешни работи веднаш по нашето барање укажа, поточно ги прецизира преземените санкции против службените лица за злосторскиот чин кој го направија врз нашите битолчани“, истакна Рамадан Рустемов, претседател на здружението „Ромско Јато“ Битола.
Полициската бруталност не смее да биде казна за оние што не ги почитуваат законите, порачаа од протестот и го осудија насилството врз Ромите, но и насилството врз полициските службеници. Побараа да престанат поделбите и на социјалните мрежи, побараа да запре и дискриминацијата врз ромското население, не само од страна на полицијата, туку во секој сегмент од општеството.
Инаку, вчера министерот за внатрешни работи Оливер Спасовски на прес конференција посочи дека поднесена е кривична пријава и суспензија за полицаецот, а суспендиран е и уште еден полицаец, кој бил присутен за време на инцидентот.