Еврокомесарката за внатрешни работи Илва Јохансон денеска ќе претстави пакет мерки за справување со миграцискиот прилив долж западно балканската рута. Оваа најава доаѓа во пресрет на самитот на ЕУ и Западен Балкан закажан за утре во Тирана како и на седницата на Советот за правда и внатрешни работи закажана за четврток.
Овој пакет мерки уследи по анализата дека оваа година има пораст на миграцијата преку рутата на Западен Балкан – особено преку Србија – при што мигрантите потоа преминуваат во ЕУ. Според податоците на Фронтекс, граничната агенција на ЕУ, 281.000 премини без документи се случиле од Балканот во текот на првите 10 месеци од 2022 година — што е 77 отсто зголемување од истиот период во 2021 година. Австрија, Белгија и Германија се главните дестимнации на овој мигранстки бран.
Акцискиот план на Јохансон кој ќе биде претставен денеска во Брисел се состои од пет точки.
— Зајакнување на граничното управување долж трасата. Земјите од Западен Балкан ќе бидат охрабрени дасоработуваат поблиску со Фронтекс во овој поглед.
— Обезбедување брз пристап до капацитетите за азил и поддршка на капацитетот за прием во земјите на транзит.
– Борба против криумчарење мигранти за која детали беа договорени на состанокот на Јохансон со министрите за внатрешни работи во регионот кој се одржа на 3 ноември, каде што беше започнато оперативно партнерство против организираните мрежи за криумчарење на мигранти.
— Обезбедување на трети земји да се придржуваат до договорите за реадмисија и враќање.
— Политика за усогласување на визите при што се очекува Комисијата да обезбеди ажурирање за ветувањето на Србија дека ќе ја усогласи својата визна политика со онаа на ЕУ кога станува збор за трети земји.
ЕУ е соочена со најголемата миграциска и азилантска криза од Втората светска војна. Околу 5,3 милиони луѓе побарале заштита во ЕУ оваа година, вклучително и 4,7 милиони регистрации за привремена заштита од страна на Украинците кои бегаат од руската агресија во нивната земја.
Борјан Јовановски