Дирекцијата за вршење на санкциите при Mинистерството за правда објави тендер за изградба на затворскиот комплекс Тетово во Општина Брвеница.
Затворот треба да содржи административен блок од 1.560 м2, оддел за засилена супервизија од 640 м2, отворена секција од 1.280 м2 и гаражи и работилници со големина од 185 м2. Покрај ова, ќе се градат просторија за бојлер, цистерна за нафта, трафостаница, цистерна за вода, бунар, како и целата неопходна инфраструктура.
Заинтересираните компании, кои сакаат да учествуваат на тендерот, треба да достават гаранција во износ од 3 отсто од сумата што ја бараат, а најуспешниот учесник на тендерот за да го потпише договорот за изградба треба да достави банкарска гаранција во износ од 10 отсто од вредноста на зделката.
Изградбата ќе трае три години до 2015 година.
Од заинтересираните компании се бара да имале годишни приходи во износ од 3 милиони евра во секоја од изминатите три години, како и три завршени договори за градба во изминатите pet години со вредност не помала од 2,5 милиони евра.
Цената ќе влијае врз исходот од тендерот со 90 отсто, а гаранцијата со 10 отсто. Писмата за искажување интерес за учество на тендерот треба да се достават до 17 јуни во 14 часот.
Покрај ова, Дирекцијата за извршување на санкции во јануари објави и тендер за изградба и реконструкција на објектите во затворскиот комплекс на казнено-поправната установа „Идризово“ во скопска Гази Баба.
Овој тендер вклучуваше рушење на постоечки објекти со бруто површина од 10.400 метри квардатни, изградба на објекти во отворената секција во машкиот затвор со површина од 5.500 метри квадратни, како и изградба на објекти, исто во машкиот дел од затворот, но во полуотворената секција со големина од 4.650 метри квадратни. Исто така, ќе биде реконструирана административната зграда која има површина од 1.000 метри квадратни, како и реконструкција на постоечкиот ресторан со центарот за обука кој има површина од 500 метри квадратни.