Ни и овој самит на Европската унија под италијанско претседателство нема да отвори преговори со Македонија, но овој пат на проблемот со името можат да му се додат и редица други забелешки кои ЕУ ги споменува во заклучоците што самитот треба да ги усвои во петок и кои денес добија печат од шефовите на европските дипломатии.
Како што НОВА објави вчера, ЕУ во идниот заклучок изразува “сериозна загриженост поради растечката политизација на државните институции и растечките недостатоци во однос на независноста на судството и слободата на медиумите”.
>> ЕУ самит: Остри критики на европските лидерите до Македонија
Ова денес го потврди и италијанскиот министер за надворешни работи Сандро Гози кој на пред конференција во Брисел изјави:
“Што повеќе властите во Скопје ги почитуваат стандардите, толку повеќе напредок ќе видиме. Ако има специфични прашања како што е случај со поранешната југоловенска република Македонија околу независноста на судството и слободата на медиумите, јасно е дека ова загрижува. Тоа се прашања на кои треба подобро да работиме заедно и да ги продлабочиме нашите дискусии затоа што ова се некои од фундаменталните стандарди кои властите во Скопје треба да ги почитуваат, рече Гози и додаде дека во македонското досие има повеќе проблеми одошто само прашањето со името.
Гози изјави дека брзината на доближувањето до ЕУ зависи од секоја држава која сама го бира патот а Македонија треба да се направи прогрес во правната држава, независноста на судството и слободата на медиумите, теми кои и понатаму се голема грижа за ЕУ.
Од Македонија се бара “брзо да превземе одлучна акција за решавање на овие проблеми”.
ЕУ смета дека “политичката криза помеѓу владата и опозицијата покажала потреба да поконструктивен и инклузивен политички дијалог” и додава дека одговорноста за тоа паѓа на владата и на опозицијата кои мораат да обезбедат политички дијалог кој треба да се води во Собранието.
За спорот со името е потребна “силна акција”: “Потребно е долгорочните дискусии за проблемот со името да бидат без одлагање доведени до конечен исход”, вели министерскиот заклучок на ЕУ.
Во доменот на добрососедските односи ЕУ бара исто така високите средби помеѓу Македонија и Бугарија да вродат со конкретни акции и резултати.