Во овие моменти на политичка криза. кога Македонија треба да ги зацврстува своите пријателски односи со меѓународните организации, нашата земја во НАТО покажала колебање кога од нас се барала јасна поддршка за политиката на НАТО во Украина.
Ова се случи истиот ден, на 11 март, веднаш по средбата на генералниот секретар на НАТО Јенс Столтенберг со премиерот Никола Груевски каде што Македонија доби поддршка за своето членство во НАТО и покрај сите забелешки за недостигот на демократски реформи во земјата во НАТО ги дели со Европската унија.
На 11 март во Северно-атлантската алијанса се одржа средба, на барање на Украина, за воениот конфликт во оваа земја. На средбата учествувале сите земји членки и земји партнери вклучително и Македонија како и рускиот амбасадор во НАТО.
Средбата се одржа речиси една година по “нелегалната и нелегитимна анексија на Крим од страна на Русија, која НАТО сојузниците не ја признаваат”, се вели во соопштението на Алијансата.
Во дебатата која следела на оваа тема, Советот на евро-атлантското партнерство изразил длабока загриженост за конфликтот во источна Украина и побарал од Русија да ги повлече своите воени сили како и да ја повлече поддршката на сепаратистите.
Сите сојузници и партнери се согласиле дека само мирно решение може да биде трајно преку примена на договорот од Минск (кој предвидува пред се прекин на оган). Генералниот секретар на НАТО повикал на повлекување на тешкото оружје на транспарентен начин кој може да се провери. Сојузниците сметаат дека стабилноста на целиот евро-атлантски регион е доведена во прашање и сите ја осудија руската “нелегална анексија на Крим” и ја повикаа Москва да се повлече од Крим.
Овој повик на земјите членки го поддржаа и многу земји од југо-источна Европа како Србија, Албанија, Црна Гора, Хрватска или Бугарија со нивните обраќања на состанокот.
НОВА дознава дека Македонија, на овој затворен состанок, одлучила да не се вклучи во дебатата и не дала свој став за ова чувствително и значајно прашање.
Со тоа, вели нашиот извор, зборовите на Столтенбер, на средбата со Груевски дека “ние ја делиме визијата за евро-атлантска интеграција и определени сме да ве поддржуваме на вашиот пат кон членство во НАТО”, не добиле достоен одговор на македонска поддршка на ставовите на Алијансата.
.jpg)
Амбасадорот Зоран Дабиќ и генералниот секретар на НАТО Јенс Столтенберг
Побаравме став и од македонската мисија во НАТО. Амбасадорот Зоран Дабиќ рече дека Македонија присуствувала на овој состанок во НАТО и покрај тоа што истиот ден се одржа и средбата помеѓу Столтнеберг и Груевски.
“За жал не би можел подлабоко да навлезам во содржинскиот дел на дискусијата имајќи го предвид затворениот карактер на состанокот.
Она што можам да го кажам е дека позицијата на Република Македонија по ова прашање е јасна и недвосмислена и е повторена во повеќе наврати. Настаните во Украина претставуваат сериозна закана за меѓународниот мир и безбедност и ги поткопуваат принципите на меѓународното право за кои сите се залагаме. Република Македонија ги почитува независноста, територијалниот интегритет и суверенитет на Украина и притоа повикува на целосна имплементација на Договорoт од Минск, како и потребата од изнаоѓање дипломатско решение за оваа криза”, вели за НОВА амбасадорот Дабиќ.
Според изворот на НОВА, Македонија не зела збор на средбата и ова молчење од македонска страна не е вистинскиот знак за македонската заложба за партнерски однос со Алијансата кој лесно може да биде протолкуван како колебање во поддршката која НАТО ја бара од своите партнери.