Околу 477 китови загинаа откако се насукаа на две оддалечени плажи во Нов Зеланд.
Ниту еден од насуканите китови не можеше да се преврти и да отплови назад во водата и сите или умреа природно или беа убиени за да им се скратат маките, рече Дарен Гровер, генерален директор на Проектот Џона, непрофитна група која помага во спасувањето на китовите.
Китовите океанот ги исфрлил на островите Чатам, со население од околу 600 луѓе, лоцирани 800 километри источно од главните острови на Нов Зеланд. Одделот за конзервација соопшти дека 232 китови се насукале во петокот и уште 245 во понеделникот.
Оваа еко-трагедија дојде две недели откако околу 200 други китови загинаа во Австралија откако се насукаа на плажа во Тасманија.
Масовното насукување на китови е вообичаено во Нов Зеланд, особено во текот на летните месеци. Научниците не знаат точно што предизвикува китовите да се насукаат, иако се чини дека нивните локациски системи може да се збунат поради малиот нагиб кој ги одвојува плажите од водата. Исто така, трагајќи по храна тие брзо доаѓаат од длабоките во плитките води.
„Тие се потпираат на нивната ехолокација, а сепак тоа не им кажува дека им снемува вода“, рече Гровер. „Тие се поблиску и поблиску до брегот и стануваат дезориентирани. Плимата потоа може да падне под нив и пред да го сфатат тоа, тие се заглавени на плажата“.
Поради оддалечената локација на плажите, труповите на китовите нема да бидат закопани или влечени во морето, како што често се случува, туку наместо тоа ќе бидат оставени да се распаѓаат.
Извор: Асошиетед Прес