Македонските граѓани преку социјалните мрежи се организираат да се вклучат во потрагата по 31-годишниот Мартин Јовановски, кој во неделата исчезна во водите на Егејското Море од плажата Мити на Халкидики.
– Потребно е едно доброволно лице, односно една кола, кој ќе се нафати да отиде до Халкидики утре. Покриено е патен трошок, смештај и јадење, целта е да се однесе опрема и лица, стручни спасувачи, кои ќе помогнат во барањето. Најверојатно ќе се остане цел викенд. Битно е да е поголема кола, караван или џип со цел да собере повеќе опрема, пишува во објавата на Фејсбук групата „Сите за Мартин“.
Во апелот на социјалните мрежи се нагласува:
„Се бараат и лица кои знаат да зборуваат грчки јазик, екипа со дронови (клубови, поединци и слично), луѓе со параглајдери/ воздухопловни екипи, бродски клубови, едрилици, чамци, глисери и слично, финансиски донации за гориво за воздухопловните и водените пребарувачи и за волонтерите, бидејќи официјалната потрага од државата е значително намалена после четвртиот ден.
Контактирајте ваши познаници, фирми и кој било што мислете дека може да придонесе и помогне на кој било начин. Да ги тагираме надлежните институции на сите објави, да бидеме што побројни и погласни. Да се чуе нашиот глас насекаде! Секоја помош е добредојдена. Да направиме сѐ што е во наши раце за потрагата да продолжи и нашиот Мартин да се врати!“, стои во објавата.
И од страната Хуманитарни акции на Фејсбук објавија:
„Почитувани хуманитарци, потребни се повеќе двогледи за утрешната екипа која ќе тргне за Халкидики во потрага по Мартин. Ќе бидат вратени соодветно со крајот на потрагата. Поради брзото организирање, ве замолуваме да ни ги предадете во Центар или Аеродром – Скопје“.
Мартин исчезна во минатата сабота, пред седум дена, кога со двајца негови пријатели, на плажата во Посиди, на Халкидики беа однесени од морските струи.
Едното момче, Васил, беше пронајден истиот ден, а другиот другар, Иван, спасителите го пронајдоа утредента, откако успеал да преживее на отворено море цели 18 часа.