Единаесет случаи на морбили се регистрирани во Скопје од почетокот на годината до сега , дознава НОВА од епидемиолози кои вршат вакцинација на терен. Станува збор за возрасни луѓе, меѓу нив има и средношколци од кои повеќето не биле воопшто вакцинирани против мали сипаници, односно морбили. Нашите извори велат дека среќна околност е што заболените не се поврзани меѓу себе и затоа се уште не може да се зборува за епидемија.
-Доколку барем два случаи беа поврзани меѓу себе, биле во меѓусебен контакт или се од ист клас, тогаш може да зборуваме за епидемија. Но и вака како што стојат работите 11 заболени само во Скопје за толку краток период е многу бидејќи претходните години сме имале по 2-3 случаи годишно, велат нашите извори.
Иако информацијата неофицијално ја потврдија во Центарот за јавно здравје, официјален став нема ниту од оваа институција, ниту о Комисијата за заразни болести. Од Центарот се повикуваат на Министерството за здравство кое за воља на вистината селективно дава информации иако се од јавен интерес и станува збор за јавно здравство.
Инаку, само во јануари за не цел месец беа регистрирани петмина заболени во Скопје, меѓу нив војник на АРМ и 14 годишно девојче.
Морбилите се многу многу заразна болест која лесно се пренесува преку допир на кожата или преку вдишување на респираторните секрети. Пациентите болеста може да ја пренесат во првите два дена пред појавата на симптомите и четири дена по појавата на осипот.
Првите симптоми се појавуваат по период на инкубација од 10 дена.
Во април 2011 во Македонија беше прогласена епидемија на морбили. Лекарите и сега стравуваат од појава на епидемија бидејќи вирусот циркулира во воздухот.
Епидемиолозите вината ја наоѓаат во слабиот одзив на вакцинацијата во последните години, поради кампањите против вакцинација во светот, па и кај нас во некои медиуми, но и во пропустите кои беа направени кај одредени генерации деца.
Токму поради ова во 2012 година потфрлила вакцинацијата, а родителите масовно одбивале да ги вакцинираат своите деца и покрај казните од државата.