Академија Пандев ја наследи Шкендија на тронот во фудбалскиот Куп на Македонија. Струмичани во финалето на 27. издание на натпреварувањето ја поразија Македонија Ѓ.П. по подобро изведување на пенали со 4:2. Победник немаше во регуларниот дел (2:2), а мрежите мируваа и во двете продолженија по 15 минути.
Стрелци во основните 90 минути на националната арена „Тоше Проески“ беа Робсон да Силва во 21. минута и Дејан Тантуровски во 84. минута за ѓорчепетровци, Сашко Пандев во 10. минута и Љупче Дориев од пенал во 86. минута за струмичани.
Но, оние што реализираа за Македонија Ѓ.П. од игра (Робсон да Силва и Тантуровски), не успеаја во ударите од белата точка додека „академците“ беа непогрешливи од 11 метри.
„Пандевци“ за првпат играа во финалето на Купот додека ѓорчепетровци по третпат. Во 2006 година ја совладаа Шкендија со 3:2, а во 2009 година загубија на пенали од Работнички.
Ова беше седмо Куп финале во кое победникот беше познат по изведување на пенали. На идентичен начин до пехарот во минатото стинуваа и Силекс во 1994 година, Слога Југомагнат во 1996 година, Цементарница 55 во 2003 година, Работнички во 2009 година, Тетекс во 2013 година и Пелистер во 2017 година.
Вардар со пет освоени трофеи е рекордер во македонскиот Куп, четири има Работнички, три Слога Југомагнат, по два понесоа Шкендија, Силекс, Тетекс и Пелистер, по една победа имаат Победа, Цементарница 55, Македонија Ѓорче Петров, Металург, Башкими и Ренова.
Успехот на Академија Пандев значи и македонски претставник плус во квалификациите за Лига Европа со оглед дека новиот Куп освојувач ќе заврши како трет на табелата до домашното првенство.