Министрите за одбрана на земјите членки на НАТО денеска ќе одржат вонреден состанок во Брисел, a на дневен ред е засилувањето на НАТО на истокот, можна мировна мисија, и заштитата на украинското небо, јавува дописничката на МИА од Брисел.
Овој нов вонреден состанок на земјите членки на НАТО ќе започне со седница на која ќе учествуваат и министрите за одбрана на Украина, на Грузија, на Шведска и на Финска, по што 30-те земји членки ќе разговараат за најголемите предизвици со кои се соочува Алијанса по три недели од почетокот на руската инвазија на Украина.
Велика Британија порача дека денеска ќе се разговара за полскиот предлог за испраќање на меѓународна мировна мисија во Украина, но дека претходно треба да се соберат сите детали за овој предлог. Естонскиот министер за одбрана не ја исклучи оваа опција, но нагласи дека за тоа ќе биде потребно зелено светло од Советот за безбедност на Обединетите Нации. Други земји членки, сепак, сметаат дека е рано за ваква мисија и дека е прво потребен прекин на огнот.
Она за што се согласни сите 30 земји членки е дека ќе продолжат да испраќаат оружје во Украина и ќе продолжат да ѝ помагаат на сите можни начини, финансиски, хуманитарни или воени, истовремено засилувајќи го присуството и подготвеноста на Алијансата во источниот дел.
Генералниот секретар на НАТО, Јенс Столтенберг порача дека мора НАТО да направи сѐ овој конфликт да не ескалира надвор од Украина.
„НАТО одговори на бруталната инвазија на Украина на единствен и брз начин, наметна строги санкции врз Русија, овозможи значителна воена, финансиска и хуманитарна помош и ја засилува колективната одбрана со зајакнување на трупите и зголемена подготвеност“, рече шефот на Алијансата.
Тој се заблагодари на САД за нивната улога во зајакнувањето на колективната одбрана на Европа преку испраќање нови трупи.
Американскиот државен секретар за одбрана, Лојд Остин увери дека членот пет на НАТО е цврст и дека во случај на напад врз една земја членка на НАТО, ќе одговори целата Алијанса.
Во овој контекст, на денешниот состанок земјите на НАТО ќе разговараат и за дронот кој падна во Загреб. Вчера Столтенберг порача дека ова беспилотно летало било невооружано, а НАТО членките чекаат да соберат повеќе детали за овој инцидент пред да одлучат како и дали ќе одговорат.
Конечно некои земји повторно на маса ќе го стават прашањето за забрана на летови над украинското небо или no-fly zones (НФЗ). Оваа иницијатива нема поддршка од САД, ниту од повеќето големи земји членки на НАТО, но естонскиот министер за одбрана, Кале Ланет, не исклучи промена во ставовите.
„Има различни ставови на оваа тема. Државите кои можат да вршат контрола врз НФЗ треба да дискутираат за ова, треба да најдеме консензус“, рече тој и истакна дека во НАТО може брзо да се променат ставовите.
„Видовме колку бргу се менуваат одлуките“, рече шефот на естонската одбрана, тоа значи дека никогаш не се знае колку брзо може да се промени одлуката за НФЗ.
Стравот во НАТО е дека доколку се прогласи зона на забрането летање, тоа ќе значи директна конфронтација меѓу НАТО и Русија и ризик од војна на целиот континент, хипотеза што Естонецот ја отфрли, но без повеќе детали.