Речиси сите раководители на сектори и друга администрација во општина Карпош се јавуваат како донатори во кампањата на Српската напредна странка чиј кандидат за градоначалник на општината беше и актуелниот градоначалник Стевче Јакимовски.
Во извештаите за финансирање на кампањата за локални избори партијата пријавила вкупни приходи од 833.209 илјади денари или околу 13 илјади евра, а потрошиле 4.306.425 милиони денари или 70.000 евра со што кампањата ја завршуваат во долгови, односно минус од околу 57.000 евра.
Градоначалникот Стевче Јакимовски на прашањето на НОВА како завршиле во минус и како планираат да ги надоместат средстсвата кусо одговори дека сите пари ќе бидат вратени.
-Па што ако сме во минус, се ќе биде покриено, изјави за НОВА Јакимовски.
Наместо одговор, добивме молчење од другата страна на слушалката кога прашавме како ќе го искоментира фактот дека речиси сите донатори се вработени во општина Карпош, а помеѓу нив има и архитекти кои претходно добивале тендери за реконструкција на згради и плоштади во општината Карпош. Оливера Груевска, Петар Теов, Мире Десоски, Никола Николоски, Бојан Милошески, Томе Ѓурчилов, Александра Теова, Љупчо Пренџов – сите се раководители на сектори во општината и сите донирале за Српската напредна странка помеѓи 10 и 40 илјади денари. Освен раководителите, во кампањата донирале и други вработени во општината, како секратарот на општината, референти од месните заедници и други.
Слични профили на донатори, односно вработени во администрацијата веќе со години се јавуваат и во извештаите на ВМРО ДПМНЕ.