По неколку варијанти на Колективен договор и неколку месечни преговори, денеска вработените се согласија за верзија со која на никого нема да се намали платата, а министерот Филипче ветил дека ќе го потпише тоа за што тие ќе постигнат договор, а не е надвор од законските рамки
Околу 80 вработени од Институтот за јавно здравје денеска се собраа на состанок, незадолни од тоа што се уште не е изготвен Колективниот договор и се уште не земале плата за март, дознава НОВА. Според информациите на НОВА, на состанокот предводен од Самостојниот синдикат при ЈЗУ, Институт за јавно здравје, вработените биле со маски на лицето и одделечени на 2 метра, за да ги испочитуваат протоколите за кои самите се залагаат.
Вработениот медицински персонал и лекарите во Инстутутот за јавно здравје кој сега, во услови на пандемија со коронавирусот функционира 24/7 и таму се изработуваат брзите тестови, земаат помали плати од другите ЈЗУ и останатите Институти. Тестовите се работат и за време на празници и секој ден во три смени.
Извори за НОВА велат дека незадоволството отишло до таму што петмина микробиолози дури најавиле дека ќе си заминат од ИЈЗ. Предлог Колективниот договор изготвен од страна на Министерството за здравство, а по предлог на ФЗОМ кој им бил доставен, не ги задоволил барањата и критериумите, а со него од 115 вработени платите остануваат намалени на 75, наместо да се зголемат на сите. Собирањето на вработените од ИЈЗ ги вознемири вработените во Министерството за здравство каде што се наоѓаат нивните простории, сметајќи дека се работи за протест.
Претседателот на Самостојниот синдикат, Борче Андоновски вели дека не станува збор за никаков протест. Тој вели дека состанокот се одвивал мирно и конструктивно, а директоно бил преку видео бил вклучен и министерот за здравство Венко Филипче.
„Министерот рече дека се запознаени и дека има расположение да се реши проблемот. Тој беше кооперативен, рече дека дека она што ќе се договориме на состанокот и како ние ќе го договориме Колективниот договор, тој тоа и ќе го потпише, денес или утре“, изјави Андоновски за НОВА.
Тој вели дека сега се е во рацете на министерот, помината е и систематизацијата, изготвени се сите акти и не треба да има проблеми за понатаму.
Пред еден месец, министерот Филипче ги посети вработените во одделот за вирусологија каде што се вршат тестирањата и се пофали дека се тоа хероите коис е деноноќно на работа.
„Ова се моите колеги од Институтот за јавно здравје, авторизираната лабораторија во која се изработуваат тестовите за коронавирус. Ова се хероите кои деноноќно се на своите работни места. Тие се таму, а вие седете дома. Да го спречиме ширењето на вирусот и да им помогнеме полесно да го надминат овој исклучително тежок период“, порача тогаш министерот, на фејсбук.
Институтот за јавно покрај вирусолошките тестови, работи на унапредување на здравјето и општата благосостојба на населението преку научно базирани сознанија, и одржливи јавно здравствени политики. Акредитирани се за околу 70 методи за тестирање и 4 методи за калибрација, има и Сектор за контрола и испитување на лекови, за испитување на храна (квалитет и безбедност – микробиологија, пестициди, тешки метали, микотоксини, радиологија), вода за пиење, минерална вода и површинска вода (квалитет и безбедност, содржина на гама-радионуклиди, алфа и бета активност), почва и атмосферски талози, градежни материјали, лекови и предмети за општа употреба (играчки, пластични предмети и керамика) и материјали кои доаѓаат во контакт со храна. Лабораторијата за калибрација е акредитирана за калибрација на инструменти за детекција на јонизирачко зрачење.