Тешката сообраќајна несреќа што се случи синоќа во 19.15 часот на магистралниот пат Охрид – Кичево, помеѓу селата Климештани и Ботун, ја однесе и втората жртва.
Повикувајќи се на извори од МВР, медиумите јавија дека во несреќата на самото место животот го загубил 29- годишен прилепчанец, а на повредите здобиени во сообраќајката подоцна им подлегнала и една девојка чиј идентитет засега не е познат. Во несреќата повредени се уште пет лица.
Според првичните полициски информации, на патот меѓу селата Мешеишта и Климештани, се судриле „пежо 206“, управувано од прилепчанец, и „џип“ со американски таблички.
Возачот на „пежото“ загинал на местото на несреќата, а шестмината повредени, од кои еден во критична состојба, веднаш се префрлени во Општата болница во Охрид и Специјалната болница за ортопедија и трауматологија „Свети Еразмо“.