Втората рунда разговори помеѓу ВМРО-ДПМНЕ и СДСМ во Брисел, со тројца европски пратеници, заврши со надеж дека работите почнуваат да се движат.
Европските парламентарци Едвард Кукан, Ричард Ховит и Иво Вајгл испратија соопштение во кое кусо се известува дека разговори се одржале и дека е договорена повторна средба без да се прецизира ни кога ни каде таа би се одржала: “Учесниците се согласија дека дискусиите ќе продолжат”, вели соопштението.
Според она што НОВА успеа да го дознае, овој втор обид на власта и опозицијата да разговараат на иста маса дава надеж дека денес во Брисел, во Европскиот парламент (ЕП), се воделе конструктивни разговори.
Пред се поради тоа што денешната средба траеше речиси цел ден за разлика од првата средба која беше доста куса. Што е сигнал дека овој пат разговорот бил посуштински.
И овој пат ниту еден од македонските претставници на партиите не даде изјава што е исто така знак дека се разговара конструктивно и дека понатамошните разговори би требало да почнат да даваат резултат.
Не може да се каже дека ставовите на двете партии се доближиле на оваа средба но може да се претпоставува дека е најден соодветен терен за разговор.
Да потсетиме дека ставовите и барања на двете партии се тврди и засега непомирливи. Но, токму тоа е причината што двете партии разговараат во Брисел а не дома во Македонија и токму од тие причини беше потребна интервенција на олеснувачи од ЕП.
По серијата «бомби» барањата на опозицијата, како што повеќе пати беше објавено, се оставки во владата и во хиерархијата на Македонската радио-телевизија како и оставка на јавниот обвинител, додека ВМРО-ДПМНЕ веројатно бара да се престане со «бомбите» за да се создаде терен за политички дијалог во Собранието. Во недостиг на изјави од владеачката партија овој заклучок се наметнува врз основа на досега објавените соопштенија на ВМРО-ДПМНЕ.
Но, според информациите на НОВА, двете партии се уште не стасале до вистински преговори и досегашните две средби можат да се наречат како еден вид загревање и разгледување на теренот на кој подоцна би се исцртале контури кои би воделе во вистински преговори. Од денешната рунда разговори произлегува дека овој процес со европско олеснување ќе трае уште извесно време и тоа најверојатно со повеќе средби повторно во Брисел.
Опозицијата, како и минатиот пат, ја претставува Радмила Шеќеринска, потпретседателка на партијата заедно со Рената Десковска и Виктор Габер а од страната на ВМРО-ДПМНЕ тука беа министрите за надворешни работи и здравство Никола Попоски и Никола Тодоров како и пратеникот Илија Димовски.
Извор на НОВА смета дека двете партии треба да се фокусираат на европската иднина на земјата и препораката за преговори која не смее да се загуби и околу сето тоа треба да најдат заеднички терен и политичко решение.
Да потсетимe дека европските олеснувачи ја имаат целосната поддршка на земјите членки на ЕУ. Во таа насока се очекува идната недела да биде усвоен заклучок на Советот на министрите за надворешни работи на ЕУ за Македонија во кој ЕУ ќе изрази сериозна загриженост за состојбата во нашата земја. Со ова треба да се стави поголем притисок врз македонските партии за конструктивност во разговорите кои наскоро треба да се претворат во вистински преговори.