Имаме доволно докази добиени од разузнавачките органи за многу офанзивно делување против органите и институциите на Србија, ова денеска попладне во изјава за „Танјуг“ беше посочено од страна на Претседателот на Србија, Александар Вучиќ како причина за повлекувањето на персоналот на амбасадата на Србија од Македонија.
Наше е луѓето да бидат подготвени. Ќе има одредени промени во персоналот за како да го заштитиме пријателството со Македонија, а и како да се однесуваме во новото опкружување. Има многу шпекулации, но сметам дека во наредните денови се ќе биде појасно, рече тој.
Вучиќ рече дека Србија сака да има добри односи со Македонија, но и дека мора да се подготви и прилагоди на новите околности.
„Ние нашите интереси ќе ги заштитиме и ќе градиме добри односи со Скопје, рече Вучиќ одговарајќи на новинарско прашање дали кризата во односите со Македонија има врска со членството на Косово во УНЕСКО.
Како да ви кажам… Тие односи ќе мора да бидат засновани на заемно почитување. Дали Албанците ќе го стават Косово на дневен ред на Собранието на УНЕСКО… Наша работа е да ги заштитиме интересите на Србија, а притоа да не ги нарушуваме интересите на другите земји, одговори Вучиќ.
Притоа тој посочи дека тука сепак има мешање од некои други сили, без да прецизира кои.
„Наше е да умееме да одговориме и да умееме да го заштитиме нашето делување од влијание на надворешни фактори“, рече Вучиќ.
Прашан дали притоа мисли на Русија, тој одговори: „Не ни помислив на Русија“.
Изјава за новинската агенција „Танјуг“ беше дадена веднаш по средбата на Вучиќ со рускиот амбасадор во Србија, Чепурин Александар Васиљевич. Дваjцата изразија задоволство од трговската размена помеѓу Србија и Руската федерација и најавија интезивирање на економската соработка и размената на капитал. Посебен акцент се стави на заедничките намери да формираат индустриска зона со цел привлекување на руски инвестиции.
Претходно Владата на РМ соопшти дека „Република Македонија развива пријателски односи со сите соседни земји. Кога постојат отворени сензитивни прашања помеѓу два наши соседа, Владата на Република Македонија секогаш ги следи интересите на државата базирани врз принципите на добрососедство и унапредување на регионалната соработка, неутралност и немешање во споровите меѓу државите, се вели во соопштението Владата на РМ, по одлуката на Белград да го повлече персоналот од Амбасадата во Скопје, по испратена нота, без за тоа да се наведат причините.
Во однос на гласањето за членство на Косово во УНЕСКО, Владата на РМ ќе ги има во предвид позициите на мнозинството земји членки на Европската Унија, се додава во соопштението.
Пред амбасадата на Србија во Скопје има редовно полициско обезбедување и додатни екипи на единицата „Алфи“. Вучиќ денеска се сретна и со рускиот амбасадор во Белград.
Вчера целиот персонал беше повлечен од Македонија, а за тоа до МНР е испратена нота, во која не се наведуваат причините.