Забрана за движење од 20 часот: Ова се новите мерки на Владата

Владата на денешната седница ги усвои препораките на Комисијата за заразни болести за заштита и спречување на ширењето на Ковид – 19. Премирот Зоран Заев на прес – конференција рече дека поради растот на бројот на заразени и починати, а на предлог на министерот за здравство Венко Филипче и Комисијата за заразни болести донесени се повеќе рестриктивни мерки.

Новите мерки предвидуваат забрана и посебен режим на движење на граѓаните од 20 до 5 часот наутро, почнувајќи од утре, до 20 април. Оваа запрана според насоките нема да важи за лицата кои извршиле имунизација и нив ќе им биде дозволено враќање дома и за време на полицискиот час.

Меѓу другото се воведува и целосна забрана за посетители и гости во сите ресторани, кафулиња, хостели, мотели, хотели, а оние кои подготвуваат храна може да ја доставуваат онлајн или по нарачка преку телефон, почнувајќи од 7 април до 20 април. Исклучок се угостителските објекти во аеродромите во Скопје и Охрид, како и за хотелите, мотелите и хостелеите, за гостите сместени во објектите.

Ваквата информација на својот фејсбук профил ја соопшти и министерот за економија Крешник Бектеши и повика на разбирање и соработка се со цел надминување на оваа ситуација.

За истиот временски период се воведува забрана и за посета на обзложувалниците, а уплата ќе се врши само на шалтер.

Повторно се воведува забрана за посета на сите фитнес сали, теретани и слично. Се забрануваат семинари, обуки, курсев.

На земјоделците им се дозволува одење на нива и на пазари.

Сите кои живеат во колективни домови и имаат куче може да ги шетаат своите миленици од 22 до 23 часот, најмногу до 100 метри околу објектот.

Останува забрана за групирање на повеќе од четворица на отворено.

Владата ги повика сите граѓани да ги почитуваат мерките, да не се организираат прослави и собири.

Министерот за здравство Венко Филипче, истакна дека новиот сој на корона вирусот остава посериозни последици кај заразените, поради што и се лекуваат подолго. Затоа, како што посочи, се воведуваат овие нови рестрикции со цел да се спречи брзото ширење, а со тоа и пренатрупување на билниците со пациенти, особено сега кога доаѓа период во кој има голем број празници.

Според премиерот Зоран Заев не треба да се бара одговорност за новонастанатата ситуација од никого особено не од здравствените власти и работници бидејќи како што посочи тие се херои кои заслужуваат ордени и благодарници.

Заев истакна дека властите во земјава секогаш носеле и носат мерки кои се врз база на анализите и се слични со тие во други земји.

Премиерот Заев соопшти и дека деновиве повторно ќе се сретне со претставниците на Алијанса за Албанците и Алтернатива со цел да се изнајде заемно прифатливо решение за законот за државјанство со што би се одблокирала работата на Собранието, а со тоа би се изгласале и законите за мерките од петтиот пакет економска помош.

Со новите рестрикции не се предвидува затворање на границите бидејќи е увидено дека заразата се шири дома, истакна македонскиот премиер.

Заев ги повика граѓаните да се вакцинираат бидејќи на тој начин како што посочи ќе ја победиме пандемијата, но нагласи дека секој, па дури и високите функционери, треба да го почитуваме редот.

За вакцините кои нашиот северен сосед Србија ги даде како донација за земјава Заев соопшти дека во знак на благодарност разгледуваат мерки за возвраќање кон српскиот нарор. Меѓу нив се размислува и за ослободување од плаќање на патарина за српските државјани во периодот од јуни до август. Според пресметките би се одвоиле околу 700 илјади евра за оваа намена.

– Верувам дека ќе претставува нешто што најмалку можеме да направиме за да возвратиме заради тоа што да се даде помош и да се сподели со нешто кое недостига насекаде во светот со својот сосед е посебно за почит и не постои друг начин како да се возврати ни од блиску, но најмалку што можеме да направиме е да возвратиме кон српскиот народ заради тоа што тие вакцини не само што дојдоа во време кога ни требаа, туку и чинат пари, а ги добивме како донација, додаде Заев.