Случај Младенов: правниците зачудени од незаинтересираноста на истражниот судија.
Објавените фискални сметки од патарините земени од необезбеденото место се голем минус за сите што се вклучени во истрагата. Без нив никој ништо не знаеше, каде бил Младенов три и пол часа. Зарем така ќе поминеше сѐ, само на претпоставки? вели адвокатот Звонко Давидовиќ коментирајќи ја истрагата која се води за сообраќајката во која загина Никола Младенов.
Навистина не ми е јасно како може да не се земе за увид и амортизер, или делови од него, кога со неговото вештачење можат да се дознаат детали за силината на ударот. Уште пострашно е, на пример, дека на местото на сообраќајката, според пишувањето на „Нова Македонија“, биле видени неколку кутии цигари.
Тоа е мошне важен детаљ, кој, сметам, може да оттргне голем сомнеж. Судијата треба да е свесен дека обврзувачки морало да направи вештачење на нив. Можеби тие цигари се нечии. Вака како што е, случајот се води како обична сообраќајка, што нималку не треба, затоа што, да не заборавиме, Младенов не беше кој било и оти веднаш по неговото загинување тргнаа лавина шпекулации дека е ликвидиран – вели Звонко Давидовиќ, адвокат од Скопје во изјава за ” Нова Македонија”