Скопски Филмски Фестивал, во партнерство со Здружението за поддршка на деца и млади со различности „Сината птица“ од Скопје, годинава за прв пат почнуваат со активности што ќе придонесат за инклузија на децата со попреченост на овој етаблиран фестивал.
Проектот „Креираме заедно“ се имплементира со поддршка од Европската Унија, како дел од програмата „ Заштита на децата од насилство и унапредување на социјалната инклузија на децата со попреченост во Западен Балкан и Турција“, а е кофинансиран и спроведен од страна на УНИЦЕФ.
Ги вклучува учениците од инклузивните основни училишта од Скопје, Тетово и Струмица, кои во духот на самозастапувањето ќе проговорат за своите проблеми и потреби, преку работилници за фотографија, видео-клип и ликовно решение за плакат за програмата на Скопски Филмски Фестивал поддржана од ЕУ и УНИЦЕФ. На почетокот на работилниците, ќе бидат одржани и обуки за детски права.
Работилниците во Струмица ќе се одржат од 13-15 февруари и ќе содржат работни групи за фотографија и видео клип, а во текот на месецов ќе се одржат и работилниците во Скопје и во Тетово.
Учениците со попреченост преку визуелни алатки ќе проговорат за своето секојдневје, за тешкотиите со кои се соочуваат дома, на улица, во училиште, а нивните типични соученици ќе се сензибилизираат за правата и потребите на нивните поинакви врсници .
Во процесот на заедничка работа тие ќе се запознаваат едни со други, ќе си помагаат и креативно ќе се надополнуваа при создавањето на крајните продукти.
На Скопски Филмски Фестивал, кој традиционално започнува на 22 април, во рамки на дводневната програма ќе бидат презентирани видеата снимени од учениците, изложба на фотографии, а планирана е и богата едукативно- забавна филмска програма за деца.
Со цел поттикнување дијалогот помеѓу релевантните институции, невладиниот сектор и родителите, планирана е дебата на тема „Kако до целосна инклузија на децата со попреченост“.
Пропратни завршни настани со слична содржина ќе следат во Струмица и Тетово .
Обуките за креативните работилници ќе ги одржат: Ване Костуранов- постер, Наташа Гелева- фотографија, Јане Алтипармаков- видео.