„Претседателот на ДУИ, Али Ахмети, ме информираше за кампањата која што ја водат, и можам само да кажам дека СДСМ останува конструктивен и е подготвен на вистински консензус по прашањето и решавањето на спорот со името. Но, по пат на политичка дебата, а секако не за поддржување на политиките на Никола Груевски“, изјави претседателот на СДСМ по средбата со Ахмети.
„Апсолутно ние сме приврзаници на тезата дека „план Б“ за Република Македонија нема. Нашето членство во ЕУ и НАТО е главен приоритет за сите граѓани во Република Македонија, главен приоритет и за СДСМ“, констатираше Заев.
Според него секако дека националните реторики, одредени проекти само не оддалечуваат и од меѓуетничката соработка и соживот, а секако и не оддалечува од ЕУ и интеграциите на Република Македонија.
„Можам исто така да кажам, рече Заев, дека претседателот на ДУИ, Ахмети, беше заинтересиран за Извештајот за настаните од 24-ти декември каде што го информирав дека реално Комисијата не може да продолжи да работи без претседател и дека ВМРО-ДПМНЕ не се согласува да прифати Уставни прекршувања и употреба на сила врз пратениците и новинарите, но секако остануваме посветени со крајна цел да изнајдеме решение за ова прашање и се надевам дека со помош на меѓународната заедница, заедно двете политички партии ќе дојдеме до конечно решение во кое што ќе има заклучни согледувања и препораки од Комисијата“.
Заев најави средби со Мендух Тачи и со Руфи Османи.