Се ближи Нова година, но овој пат нема да си посакаме здравје оти ни го зедоа, нема да си посакаме среќа оти ја нема веќе, насекаде гледаме само несреќни луѓе, нема да си посакаме повеќе пари, оти нема – се украдоа, за семејна кохезија нема да зборуваме оти не можеме да си го собереме семејството – сите бегаат надвор од државата. Овој пат под елката ќе си посакаме само една желба – заминување на Груевски од власт во 2015 година, порача претседателот на СДСМ, Зоран Заев од синоќешната трибина во Струмица.
Лидерот на опозицијата го повика Груевски на дуел и му порача да дојде во Струмица, за како што вели да види како успешно се води општина.
„Го повикувам повторно на ТВ дуел, на Сител, на Канал 5, на МТВ, на сите заедно, да отвориме дебата, да разговараме за прашањата во Македонија, ако сака натпревар на идеи и проекти и за тоа ќе зборуваме. Истовремено можеме да му кажеме дека во Струмица, ќе му отвориме бесплатно училиште без екстерно, но ќе му дадеме и бесплатни лекции како успешно се води општина без ниту еден денар кредит, ќе му покажеме што значи гасификација, како се градат подземни улици и на крај да му покажеме што е слобода и демократија, што е дебата и како се води општество без закани и уцени, рече Заев.
Првиот човек на опозицијата потенцираше дека секогаш кога се случуваат тензии во државата, како протестот на студентите, аферата со фалсификуваните документи, Груевски е некаде надвор. Но Заев рече дека секогаш кога се случуваат крупни работи кои конвертираат со слобода, отпор, храброст, се случувале и некои други работи преку ноќ, како последниот случај со промената на грбот на државата.
„Знам само дека круната на грбот што претставува пет бедеми, со кулите што ги има на неа, ја симболизираат алката на злосторничкото здружување – партијата на власт, владата, судството, полицијата и медиумите. Тие пет зла ја донесоа денеска Македонија на оваа дереџе. Ама да знаете дека под тој бедем ќе ја поставиме бомбата“, истакна Заев.
Тој додаде дека народот секојдневно го прашува што се случува со бомбата. Пред присутните на трибината најави дека нема да има една туку повеќе бомби.
„Првата бомба ќе биде доволна да замине оваа власт, втората ќе биде појака од првата, за неколку дена ќе се случи и трета бомба, појака од втората, а за три четири дена ќе се случи четвртата појака од третата, и нема да застанеме додека злото не си замине, порача Заев.
На трибината се обратија и заменик претседателката Радмила Шекеринска, секретарот на партијата Оливер Спасовски и лидерот на ЛДП, Андреј Жерновски.
Шекеринска потенцираше дека денеска во царството на лагите вистината била токму бомбата.
Секретарот на партијата Спасовски пак истакна дека бомбата и испреплетеното минско поле се кај Груевски, а само фитилот е кај Заев и затоа власта била толку многу исплашена, а лидерот на ЛДП, Жерновски, во своето обраќање рече дека Груевски додека ја чекал бомбата од Заев, бомба му се случила пред Универзитетот Св. Кирил и Методиј.
После обраќањата на првите луѓе од опозицијата прашања поставуваа и присутните. Покрај преполната сала во Центарот за култура Антон Панов, трибината се следеше и преку видео бим во ходникот .