Работата на Државната изборна комисија и Управниот суд беше формална за утврдување на фактите и вистината. Меѓутоа таа не влијае на резултатот од изборите, ако се земе предвид волјата на над 600.000 граѓани, порача денеска лидерот на СДСМ Зоран Заев, во обраќањето пред Собранието, одбележувајќи го 24 декември – црниот понеделник.
– Цело време укажуваме дека треба да бидат следени процедурите и да бидат почитувани државните институции како ДИК и Управниот суд, иако апелиравме дека евентуална промена на севкупниот број на мандати, не влијае на тоа кој ќе ја формира Владата. Сепак поради вистината и фактите, процесот треба да заврши демократски, регуларно и кредибилно, рече Заев.
Заев сепак повика, на прегласувањето в недела на гласачкото место во Теарце партиите да се воздржат од интервенции, а граѓаните да излезат и да гласаат по свое убедување.
Според него промените во Македонија веќе започнале и никој не може да ги спречи, бидејќи, како што рече над 600.000 граѓани, без разлика на својата етничка припадност побараа демократска иднина за Македонија, за која Заев рече дека „нема да дозволи да биде оштетена преку заканите на Никола Груевски кон меѓународната заедница и невладините организации во земјата“.
– Сите партии мора да ја почитуваат јасно искажаната волја на мнозинството граѓани на последните избори за промени. Посебна одговорност имаат лидерите на партиите кои не смеат да помислат заради финансиски, коруптивни понуди или водени од лични или теснопартиски интереси, да не ја испочитуваат волјата на граѓаните, изјави претседателот на СДСМ, дополнувајќи дека соработката со Груевски би значела соработка со режим и диктатура.
Заев воедно порача дека новиот парламентарен состав ќе ја почитува пред се новинарската фела и ќе ја штити волјата на огромното мнозинство. Воедно тој најави дека ќе бидат целосно транспарентни и кога ќе се носи буџетот на РМ премиерот и министерот за финансии ќе дебатираат јавно со опозицијата на Македонската радиотелевизија, а нема да се крие јавниот долг на државата од јавноста.
Во однос на негативната кампања на ВМРО ДПМНЕ за двојазичност и федерализација, Заев потенцираше дека Македонија има европски Устав во кој е загарантирана употребата на јазиците, а поимите за федерализација се плод на имиганиција на безидејниот Никола Груевски.
– Ние сме убедени дека режим и диктатура заврши во Македонија. Апсолутно логичноста на одлуките кои што следат во Македонија, се нешто кое што воопшто не треба да не изненади, одговори Заев на новинарско прашање дали е тој следниот мандатар.