Утре во 12 часот во Oсновниот суд 2 ќе се одржи подготвителното рочиште за судењето за клевета во тужбата која премиерот и лидер на ВМРО ДПМНЕ Никола Груевски ја покрена против лидерот на опозициската СДСМ Зоран Заев. Груевски го тужи Заев за наводите за поткуп од случајот „Македонска банка“ кога тој на пресконференција го обвини Груевски дека зел поткуп од 1,5 милиони евра од продажбата на „Македонска банка“, а како доказ понуди аудио снимка на која се заговара наводниот поткуп, како и тоа дека, еден од гласовите на снимката, според Заев е гласот на Никола Груевски.
Во меѓувреме, Јавното обвинителство почна да постапува по пријавата за наводен поткуп во овој случај, но и по два месеца се уште нема никаков исход.
Премиерот Никола Груевски од лидерот на опозицијата Зоран Заев бара половина милион евра оштета.
Се очекува судењето да го следат огромен број на медиуми, претставници на невладини организации и претставници на меѓународни организации и дипломатскиот кор.
Минатиот јули во тужба за клевета од страна на премиерот беше осуден и лидерот на опозициската НСДП Тито Петковски. Груевски тврдеше дека бил наклеветен од Петковски кога тој во интервју рекол дека премиерот се согласил на промена за името на самиотот на НАТО во Букурешт во 2008 година. Судот пресуди дека Петковски треба да му плати на Груевски 650,000 денари оштета.