Претседателот на Владата, Зоран Заев, денеска оствари средба со поглавари на верските заедници во земјава на која е донесен заеднички заклучок да се упати апел до граѓаните да ги почитуваат мерките на владата за спречување на ширењето на Ковид – 19.
Според информациите на состанокот станало збор и за други актуелни прашања од значење на верските заедници во земјава.
Присутните на средбата исто така изразиле поддршка на процесот на вакцинирање по што упатија заеднички повик до сите граѓани да се пријават за вакцинација, со што ќе дадат придонес во сочувувањето на своето и на јавното здравје.
Заеднички е констатирано дека во овие моменти кога човештвото се соочува со непредвидлив вирус, потребна е разумност од страна на сите верници, бидејќи болеста не избира религии и нации.
На средбата е заеднички оценето дека од почитувањето на мерките, ќе зависи и како граѓаните ќе ги поминат претстојните празници: Велигден и Рамазан Бајрам, а јасно е дека постои желба кај сите за одбележување на големите верски празници во мир и спокој и заедно со најблиските во семејството.