– Во однос на претходната средба и двете страни дојдоа подготвени, верувам дека до крајот на неделата врз основа на анализата која што експертите од МВР ќе ја направат ќе можеме да финишираме со закопнското решение за државјанствата, истакна премиерот Зоран Заев по денешната средба со лидерите од опозициската коалиција Алијанса – Алтернатива, Зијадин Села и Африм Гаши.
Заев додава дека врз основа на постигнатиот напредок на средбата било разговарано за сите отворени прашања кои што беа предлог во законското решение од ААА и изнајдени се механизми за законско решение.
– За деталите не би зборувал бидејќи ние сме политички претставници, а сега нив треба експертите да ги стават на анализа и да ги стават на хартија за да го процесуираме законското решение. Секако ќе бидат информирани за ова и ВМРО – ДПМНЕ и Левица бидејќи имаат ставено свои амандмани по однос на ова прашање, но мислам дека денеска направивме сериозен исчекор во поглед на решавање на ова важно прашање за граѓаните, додаде Заев.
Анализите со кои што влеговме денеска беа од голема помош и се видоа детално бројките колку граѓани немаат државјанство, кои се родени тука или со стапување во брак, враќање од странство бараат државјанства и врз основа на тоа ги отворивме сите важни прашања со кои што заокруживме доминантни европски пракси.
– На пример кај нас годините за стекнување со државјанство се осум, во некои од европските земји се пет, шест, ќе се извади некој просек од ЕУ, и за многу други прашања кои што беа извадени ја влечеме европската пракса и можам да кажам дека направивме сериозен исчекор, целта е до крајот на неделата да се оформи законскиот текст и веќе следната недела Собранието да се изјаснува по самото законско решение, истакна премиерот.