Алијансата на Албанците може да го изгуби местото за министер за здравство бидејќи, како што рече премиерот Заев избираат човек на кој ќе му веруваат граѓаните, а не партија.
До крајот на неделата треба да одлучиме кој ќе биде новиот министер за здравство. Пресудно ќе биде името, а не партијата бидејќи треба да избереме човек на кој граѓаните ќе му веруваат, изјави денеска премиерот Зоран Заев. Реконструкција на Влада ќе има доколку биде избран кандидат кој не доаѓа од Алијансата за Албанците, рече премиерот Заев.
„Се уште немаме одлучено. Почнавме разговори со коалиционите партнери, се надеваме дека до крајот на оваа седмица ќе можеме да донесеме одлука. Сите опции се отворени, во моментов ниту јас знам кое ќе биде името, од која политичка партија, кој ќе биде избран од кандидатите. Здравството е високо во очекувањата на граѓаните. Ако дојде од Алијансата за Албанците тогаш нема да има реконструкција на Владата. Ако дојде пак од друга политичка партија логично е дека Алијансата останува во владината коалиција и треба да има министерско место. Затоа се отворени сите овие можности за дебата. Пресудни ќе бидат имињата кои ни стојат на располагање и кој ќе ја преземе оваа одговорна функција“, рече премиерот Заев
Премиерот рече дека Алијансата на Албанците веќе му доставиле име на нивниот кандидат, но нагласи дека се разгледуваат сите опции бидејќи здравството котира високо во приоритетите на Владата.
„Во одлучувањето мора да не води прво името на кандидатот за да може граѓаните, пациентите, лекарите, медицинската фела да му веруваат. Тоа е минимумот што го очекуваме, а потоа заедно со сите се надевам на успешни реформи во здравството затоа што се неопходни“, рече Заев.
Тој нагласи дека локалните избори донесоа турбуленции, чекале да легнат работите и ден поскоро ќе седнат да се договорат за најмудрото можно решение.
Од друга страна, лидерот на Алијансата за Албанците Зијадин Села за НОВА изјави дека остануваат на ставот дека идниот министер за здравство треба да биде од нивната партија.
„Останува на ставот дека министерот за здравство треба да биде избран од Алијансата на Албанците. Така се договоривме во преговорите пред локалните избори. На следната седница на Влада очекуваме да се донесе одлука“, изјави Села за НОВА.
Министерството за здравство практично е скоро два месеца без министер за здравство. Иако заменикот министер Гоце Чакаровски неодамна изјави дека нема застој во работата на министертвото, премиерот Заев денеска кажа дека морале да го овластат за да можат да се платат сметки за струја, вода и греење.