„Благо кажано политичката состојбата во Македонија е сложена и проблематична. Република Македонија е држава во која владеењето на ВМРО ДПМНЕ и неговите коалициони партнери покажа сериозни пропусти и слабости“, вели во интервју за бугарски Фокус, претседателот на СДСМ, Зоран Заев.
На прашањето, како ја оценувате политичката ситуација во Македонија, Заев вели: Во Македонија институциите на системот се нефункционални и под притисок на владејачката гарнитура. Наместо реформирано имаме контролирано судство. Сериозно е загрозена слободата на медиумите, а има случаи на притворени новинари без издржано образложение.
– Македонија е земја и на политички затвореници. Критичарите на нејзините политики власта ги етикетира како предавници или странски платеници. Државата интензивно и непродуктивно се задолжува, а граѓаните живеат во се поголема сиромаштија. Од пример на стабилна, мултиетничка и мултиконфесионална демократија, Македонија денеска се наоѓа во сивата зона на конфликтности во општеството што претставуваат сериозна опасност и закана за стабилноста на земјата, вели Заев.
На прашањето на Фокус за европската интеграција на Македонија и неспомнувњето на Македонија во заклучоците од Самитот на ЕУ, Заев вели дека осум години подоцна, од кои седум години на власт е коалиционата влада предводена од ВМРО ДПМНЕ, Република Македонија наместо предводник, се стекна со епитетот „Турција на Балканот”.
– Само несериозна и неодговорна влада причините за ваквиот стратешки неуспех може да ги препише на двојните стандарди на земјите членки на ЕУ, или да ја обвинува опозицијата, притоа без ниту еден збор самокритичност за сопствените политики. Факт е дека оваа власт доживеа целосен неуспех во евроинтегративните процеси, за кој премиерот Груевски и неговата влада мора да понесат одговорност, вели Заев.
Според претседателот на СДСМ, за жал, премерот Груевски одлучи да го монополизира и авторизира прашањето за името, а СДСМ и опозицијата во Македонија е целосно исклучена од процесот на преговарање.
– Можеби звучи неверојатно, но дури ниту за содржината на последниот предлог на посредникот на ОН, господинот Метју Нимиц, ние како најголема опозициона партија немаме никакви информации. Во меѓувреме, предлогот е тема на секојдневни коментари во медиумите во Грција, објаснува Заев.
Според него, за жал меѓусебната недоверба на Балканот изнудува решенија што се одамна надминати во цивилизираниот свет.
– Ние се уште имаме потреба од потпишување договори за основните прашања што ги регулираат меѓудржавните и меѓучовечките односи. Меѓутоа, без оглед на формата, неопходни и максимално корисно за двете земји е што поскоро да изнајдат взаемна согласност и да ги надминат меѓусебните недоразбирања. Република Македонија и Република Бугарија се соседски, пријателски земји. Делиме многу заеднички моменти од минатото, но уште позначајно треба да создаваме заедничка иднина втемелена врз принципите на взаемна почит и пријателство, смета претседателот н а СДСМ.
– Без слободни и независни медиуми нема услови за демократија во општество. Тоа им е јасно на сите, освен на Груевски, вели Заев прашан од Фокус за состојбата со слободата на медиумите во Македонија.