Премиерот Зоран Заев ги отфрли тврдењата на пратеникот Скендер Реџепи денес во Собранието дека има некакво политичко влијание во процесот „Монструм“ и дека, според него, се осудени невини луѓе. Тој порача дека целосно го исполнил ветувањето да даде се што можело да се употреби околу расветлување на случајот, со конечна цел да се дојде до правда, или како што рече – невините да не лежат во затвор, а виновните да одговараат. Тој притоа повика политичарите да не даваат лажни надежи и да ги тргнат рацете од судството, бидејќи тоа треба да ги носи одлуките, нагласувајќи дека за „Монструм“ имаше целосно транспарентен процес кој беше повторен и го водеа сосема други обвинители и други судии.
„Зошто додека бевме заедно во власта не направивте ништо“, го праша Заев Реџепи порачувајќи му дека политичарите имаат одговорност и должност да охрабруваат доверба во судскиот систем, а не да ја спорат како во овој случај.
-Многу е важна нашата улога каква држава, какво општество димензионираме, во кој правец ја насочуваме државата и пред се младите луѓе. Затоа што не е во ред да се дадат лажни надежи. Тоа што ние можеме како политичари е да помогнеме во потврдување на доволно докази за реотворање на процеси и предмети. Tоа го можеме преку институциите што се под Парламентот или Владата затоа што тие се управувани директно од политичарите, а согласно докази и аргументи обвинителите треба да одлучуваат и судовите да пресудуваат, рече Заев.
Појаснувајќи ги деталјите околу фамозното ветување за „бомбите“ тој рече:
-Уште во периодот на објавување на бомбите должност моја беше и како човек и тоа го сторив, сите прислушкувани материјали ги предадов во СЈО. Се отворија предмети и процеси, се реотворија, дел завршија успешно, дел завршија со повторување на казна, нови судски процеси. Ветувањето дека е вредно се за кое постои било каков дополнителен доказ и индиција, впрочем и нашите закони тоа го предвидуваат и Собранието отвори дискусија за посебни законски решенија на оваа тема се со конечна цел – правда. Ова е еден од случаите во нашата земја кој доби повторување на постапка. Сите транскрипти, т.н. бомби, беа презентирани на јавна седница во судот, сите достапни на јавноста. Внимателно преку јавно достапните информации го следев целиот овој процес затоа што е чувствителен и за семејствата кои ги загубија децата и рибарот, и за луѓето кои се осомничени, и еве повторно осудени, дел ослободени, рече Заев.
Правосудниот систем, како што нагласи, е тој што ги носи одлуките.
– И ако на кој било начин подгревано, неосновано, ставајќи го самиот систем под прашалник моја должност е да прашам, зошто таа година кога бевме заедно не направивте нешто со мене, затоа што не е наша работа, ниту тогаш ваша, ниту сега наша, ниту тогаш наша. Тоа е работа на јавно обвинителство и судот. Дефинитивно мора да знаеме дека политичарите треба да ги тргнат рацете и од судството и обвинителството. Таму течат процесите, рече Заев.