– Нашите здравствени власти даваат максимум. Тие се нашите херои, од министерот Венко Филипче до секој здравствен работник. Подготвуваме ордени и благодарници и јас лично ќе ги делам. Ако мислите дека одговорноста ќе помогне, грешите – одговори премиерот Зоран Заев на денешната прес – конференција во Влада прашан дали тој или министерот за здравство или членовите на Комисијата за заразни болести чувствуваат одговорност поради задоцнети рестриктивни мерки.
Заев истакна дека властите во земјава секогаш носеле и носат мерки кои се врз база на анализите и се слични со тие во други земји.
– Немаме економски приоритети на сметка на здравствените. Здравјето пред се и над се. Државата е стабилна финансиски, ликвидна е финансиски и немаме предрасуди се што треба да направиме да го осигураме здравјето на граѓаните. Економски сме добри, но сепак не треба да предизвикуваме опасност за економијата. Се носат мерки тогаш кога треба, еве денеска треба. А ќе има и одлуки за поддршка на бизнисите кои ќе бидат засегнати од новите мерки. Никој нема да биде оставен сам, ова е држава за сите. Нема да понесам и нема да барам одговорност. Верувам дека се потребни позитивни вести. Апсолутно, нема потреба од одговорност, рече премиерот.