„Еден од првите приоритети на Владата од 2017 година беше нормативно заокружување на Рамковниот договор. Тогашниот состав ја исполни обврската што непотребно се одолговлекуваше со години и се усвои Законот за јазиците и сите подзаконски акти за правична застапеност, а со тоа се заокружи Рамковниот договор што произлезе од конфликтот“, кажа премиерот Зоран Заев на тематската седница по повод одбележувањето на 20-годишнината од Охридскиот рамковен договор. Заев додаде дека оваа значајна годишнина се совпаѓа со триесетгодишнината од осамостојувањето на државата.
-Конфликтот понесе и жртви, но со Договорот веќе не сме општество без надеж, кажа премиерот, нагласувајќи дека на принципите на недискриминацијата и правичноста државата се гради во општество за сите. „Охридкиот рамковен договор ја испрати пораката на меѓусебно разбирање, извинување и простување. Тој донесе нов дух на водење политики, политики што градат мостови, а не ги рушат“, рече Заев.
Според него, со овој договор нашата држава е постабилна и побезбедна, со посилна социјална кохезија и ги постави темелните вредности за решавање конфликти, по што следувале и Преспанскиот договор и Договорот за добрососедство и пријателство.
-Се определивме за политики што ја градат Северна Македонија како граѓанска држава за сите кои живеат во неа. Прифативме дека Македонците како мнозински народ имаат одговорност за афирмација и поддршка на сите останати заедници што живеат во земјата, а и помалите заедници имаат одговорност за афирмација и поддршка на македонскиот идентитет, кажа Заев.
По говорот на премиерот, следуваше аплауз кој го поттикна првиот потпретседател на Владата, Артан Груби.
-На овој начин, со храбри чекори се гради едното општество за сите и се заврсти евроатлантскиот пат на земјата, порача Груби, кој откри дека мотото на одбележувањето на јубилејот гласи „По Охрид“.