-Низ поглавјата се трансформира нашето општеството. Ние дома продолжуваме да го правиме она што како критериуми ни ги даваше ЕУ, како обврски кои треба да ги исполниме. Друга алтернатива немаме, рече премиерот Зоран Заев во емисијата „24Отворено“ на ТВ 24.
Заев уште еднаш укажа дека земјава има најдобри резултати од земјите од Западен Балкан кои го очекуваат датумот за почеток на претпристапните преговори со ЕУ.
Тој посочи дека посериозно ќе се посветат на воспоставување на стратешко партнерство со САД преку членството во НАТО.
Американскиот Сенат со огромно мнозинство го ратификуваше Протоколот за НАТО
Прашан зошто се одлучил да предложи предвремени избори, Заев рече дека политичкиот момент во нашата држава и „урнисаниот дел од сонот за НАТО и ЕУ интеграциите“ придонеле тој да го смени ставот дека треба да се оди на редовни избори и да се даде шанса на предвидливост на стопанството и граѓанството.
– Требаше да испратиме два вида на пораки. Првата е до Европската унија. Следниот пат да знаат дека тоа има директно рефлексии дома. Нашиот народ има право сега да биде исправен и да донесе одлука-дали остануваме на вистинскиот курс, на патот кон нашите интеграции, и уште еднаш да потврдиме дека ние сакаме во ЕУ, не заради тоа што треба да бидеме само членка, туку заради европските вредности. Јас не се сомневам во таа одлука, но тој треба да ја донесе таа одлука, изјави Заев во интервју на телевизија 24.
Втората порака, посочи Заев е, тоа што не смееме да дозволиме како држава да предизвикаме други незгодни состојби до мајскиот самит во Загреб.
– Искрено се плашам дека може да се појави вишок национализам и радикализам, кој што би бил провокативен дома меѓуетнички, но би бил провокативен и надвор. Во вакви околности кога горчината и неправдата ја чувствуваат сите може да предизвика реторика дома што би била соодветна провокација во Грција, во Бугарија за на мајскиот самит на потпишани договори да се случи некој проблем, изјави Заев.