Премиерот Зоран Заев во пресрет на самитот на Европскиот совет што треба да се одржи на крајот од јуни во Брисел, на кој треба да се утврди датум за пристапни преговори на нашата земја со ЕУ, денеска заминува во посета на Германија каде очекува позитивна порака од канцеларката Ангела Меркел во однос на добивањето на датумот за преговори.
Канцеларката Ангела Меркел, Германија и сите 28 земји членки на ЕУ се конечно позитивни за Република Северна Македонија. Петнаесет години го чекаме овој датум за почеток на преговорите. Заслуживме како никогаш досега. Верувам дека на крајот ќе добиеме конкретна верификација и од канцеларката, но и од Европскиот совет, изјави премиерот Зоран Заев во емисијата
„Отворено“ на телевизија 24.
Прашан што очекува од средбата со канцеларката в четврток, Заев посочи дека сто проценти се потврдени нашите перформанси во делот на реформите и блескавоста на договорот со Бугарија и Грција се конечна потврда дека ние исполнивме се и дека суштината е кога исполнивме се и Европската Унија тоа што го вети треба да го исполни.
– Веројатно по состанокот со канцеларката Меркел ќе имаме подетални информации. Јас сум убеден дека најмалку ќе биде верификувано се што е направено и дека ќе има јасно прецизно определување кога ќе го добиеме датумот за преговори. Мене ми е јасно дека јуни не е толку извесна можност, но имаме можности за јули, изјави Заев.
На прес конференцијата со чешкиот премиер вчера, Заев рече дека политичките одлуки во земјата за тоа дали ќе има реконструкција на Влада или предвремени избори ќе зависат токму од одлуката на Европскиот совет, како и од пораките и јасното соопштување за извесните чекори коишто ќе му ги пренесе канцеларката Меркел.
Најави дека по средбата со Меркел во четврток, веројатно идниот викенд ќе следи седница на Централниот одбор на СДСМ, дека се постојано во координација со коалициските партнери и во зависност од одлуката на парламентарното мнозинство и дали тоа ќе се додржи така ќе ги носат одлуките.
-Транспарентни сме до самиот крај. Верувам дека јуни месец ќе ги заокружи сите овие политички одлуки дома затоа што се што работиме е заради интеграциите во ЕУ и НАТО кои ни влијае комплетно позитивно на економските процеси и реформите, рече Заев.
Работната посета на премиерот Заев на Берлин е на покана на Стопанската комора на СР Германија за источна Европа. Според најавата од владината прес-служба, Заев ќе предводи делегација на годишниот прием на Стопанската комора на Германија за источна Европа на кој ќе има свое обраќање.
